"တစ်ကိုယ်တည်း... ဒါပေမယ့် ခြင်္သေ့"
"ဝတ္ထုတို(စဆုံး)"
ရဲရဲနီနေတဲ့ နှင်းဆီပန်းတစ်ပွင့်ကို
လှလွန်းလို့ ပန်းပင်ထဲကနေ ခူးလာခဲ့မိတဲ့ကျွန်တော်..
နှင်းဆီဆူးတို့ လက်ထဲစိုက်ဝင်ကုန်လို့ လွှတ်ချလိုက်မိစဉ်
သိပ်လှတဲ့ ဒေါက်ဖိနပ်တစ်ရံရဲ့ နင်းချေမှုကြောင့် ကျွန်တော့်ပန်းလေး ညှိုးကြွေသွားတယ်။
"sorry.."
ခပ်မာမာလေသံနဲ့ နန်းဆန်သူ မိန်းကလေးတစ်ယောက်မို့ ကျွန်တော်အပြစ်မတင်ရက်ခဲ့တာတော့အမှန်။
"ထွဋ်ခေါင်.. အဆင်ပြေရဲ့လား"
"သူမဘယ်သူလဲ"
"သြော်...
မင်းလည်း သူ့ကို ကြွေသွားပြီထင်တယ်။
သူ့နာမည် ဆောင်းစက်ဝိုင်တဲ့။
ဝိုင်တစ်ခွက်လို စူးရှတဲ့မိန်းမ။ အရမ်းလှတယ်။
ဒါပေမယ့် မာန အင်မတန်ကြီးတယ်"
"ငါသူ့ကိုလိုက်ချင်တယ်"
"ဒါတော့ မင်းအပိုင်းလေ။ သေချာတာကတော့ သူ့အချစ်ကို ရဖူးတဲ့ယောက်ျား တစ်ယောက်မှမရှိသေးဘူး"
"ငါရအောင်လိုက်ပြမယ်"
"Bravo သားကြီး။ အောင်မြင်ပါစေ"
ကျွန်တော် အိမ်ရောက်တာနဲ့ သူမအတွက် ကဗျာတွေရေးတယ်။ ဒါပေမယ့် သူမအလှကို ဖွဲ့နွဲ့နိုင်လောက်တဲ့ ကဗျာစာသား ကျွန်တော့်မှာမရှိဘူး။
"ဆောင်းစက်ဝိုင်! ဆောင်းစက်ဝိုင်!
မင်းဟာ သိပ်လှပတဲ့မိန်းမတစ်ယောက်ပဲ"
"ကိုကြီး..ဘာလုပ်နေတာလဲ!"
အခုမှ အိပ်မက်ကလန့်နိုးသူနှယ် အလန့်တကြားကြည့်မိလိုက်တော့ "မိုးမခ"။
"အင်း..ကဗျာ စပ်မလို့ပါကွာ"
"ဒါဆို အတော်ပဲ။ ညီမလေးအတွက်ပါ စပ်ပေးပါ"
"ကောင်းပြီ"
"မိုးမခရေ သမီး
အန်တီ့ဆီလာပါဦး။ မတွေ့ရတာ ကြာလို့လားမသိဘူး။ အန်တီ့သမီးလေးက သိပ်လှနေတယ်"
"ဟုတ်အန်တီ။ ကျေးဇူးပါ"
"ထိုင်ဦးသမီး။
သားရေ...
မင်းညီမ လာလည်တယ်လေ။ စကားလာပြောဦးလေ"
"ရပါတယ်အန်တီ။ ကိုကြီး ကဗျာစပ်နေတယ်တဲ့"
"ဟုတ်လား...
အမလေး မပြောချင်ဘူးသမီးရေ။
သူ့အရေမရ အဖတ်မရ ကဗျာတွေလည်း အန်တီထိုင်မဖတ်နိုင်ဘူး"
"ဟုတ်ကဲ့"
ကျွန်တော်ကြားပေမယ့် မကြားချင်ယောင်ဆောင်ထားရတဲ့စကားထဲမှာ မာမီ့ရဲ့အဲဒီ့စကားတွေပါတယ်။
အာရုံက ကျွန်တော့်ကဗျာထဲမှာမို့ မိုးမခ ဘယ်ချိန်ပြန်သွားလဲ ကျွန်တော်မသိလိုက်ဘူး။
"မိုးတွေသည်းလိုက်တာ။
စိတ်ညစ်ပါတယ်။ ထီးကလည်းမပါဘူး"
ကျွန်တော့်ရဲ့နတ်မိမယ်လေး ညည်းနေလေရဲ့။
"ကျွန်တော့်ထီး ယူသွားပါလား"
"အို..နေပါစေ။ ဝိုင်ယူသွားရင် ရှင်မိုးစိုသွားမှာပေါ့"
"ရပါတယ်..ယူသွားပါ။
နှစ်ယောက်တည်း ထီးတစ်ချောင်းဆောင်းဖို့ကျတော့ ဝိုင့်သိက္ခာကျမယ်လေ။ ကျွန်တော်ပြောတာမှန်လား"
ဝိုင်ဆက်မငြင်းမိ။ သူ့ထီးအောက်ထဲ ဝင်လိုက်ရင်း နှစ်ယောက်အတူ ထီးဆောင်းလိုက်တယ်။
"ကျွန်တော့်ကို ယုံကြည်ပေးလို့ ကျေးဇူး"
"မလိုပါဘူး..
ဝိုင်က ကျေးဇူးတင်ရမှာပါ။ မိုးရေထဲ မိန်းကလေးတစ်ယောက်တည်း ထီးမပါဘဲသွားပြန်ရင်လည်း ဝိုင့်ဣနြေ္ဒပျက်မှာကြောက်တယ်။ ရှင့်ထီးယူပြီး တစ်ယောက်တည်းဆောင်းသွားရင်လည်း တစ်ကိုယ်ကောင်းဆန်ရာရောက်တယ်"
"ဝိုင်သိလား..
ကျွန်တော် ဝိုင့်တွေးခေါ်ပုံကိုသဘောကျတယ်"
"ကျေးဇူးပါပဲ"
ထိုနေ့က ကျွန်တော့်အတွက် မိုးရွာနေလျက်နဲ့ သာယာနေတဲ့နေ့ပဲ။
ဝိုင့်လက်ထဲရောက်လာတဲ့ စာရွက်လေးကိုဖွင့်ကြည့်လိုက်တယ်။
"နှင်းဆီ"
ဆူးခက်ဝန်းရံ
မာန်ဟန်ရဲရင့်
ဝင့်ကြွားထည်ဝါ
မာန်ထည်ဝါဖြင့်
ချူလိုသူတို့
ခူးချင်ကြကုန်
ဆူးစူးကုန်၏
မြတ်သောနှင်းဆီ
ဆူးခြံရံမှ
တင့်တယ်လိမ့်မည်
တင့်တယ်မည်သာ။
"မဆိုးပါဘူး။ ဒါနဲ့ရှင်က ကဗျာဆရာလား"
"ကဗျာဆရာတော့မဟုတ်ပေမယ့် တစ်ခုခုခံစားမိရင်တော့ ကောက်စပ်လိုက်တာပဲဗျ"
"ဒါဆို.. ဒီကဗျာက ဘယ်သူ့ကို ကိုယ်စားပြုတာလဲ"
"ကျွန်တော့်နှလုံးသားကို အပိုင်ယူသွားတဲ့ မိန်းမလှလေးတစ်ယောက်ကိုပါ"
ရုတ်ချင်းတည်သွားရာမှ ဝိုင်တခစ်ခစ်ရယ်နေတယ်။
အဲဒီ့ရယ်သံတွေက ကျွန်တော့်ကို သတ်နေတဲ့ အပြင်းစားလက်နက်တွေပဲ။
"သား.. ဒီကိုလာဦး။
မာမီ မင်းကို ပြောစရာရှိတယ်"
"ဘာများလဲမာမီ"
"လိုရင်းပဲပြောမယ်သား။
မင်း ဝိုင့်ကို လိုက်နေတယ်ဆို"
"ဗျာ... မာမီ ဘယ်လိုသိ.."
ဒေါ်ခွန်းချို ထရပ်လိုက်ရင်း လက်သီးကျစ်ကျစ်ပါအောင် ဆုပ်ထားလိုက်တယ်။
"သူက ဘယ်သူ့သမီးလဲဆိုတာ မင်းသိအောင်ပြောရရင် ငယ်ငယ်ကတည်းက မင်းကို အိပ်ရာဝင်ပုံပြင်တစ်ပုဒ်လို အမြဲပြောပြခဲ့ဖူးတဲ့ ဦးလွန်းစက်ရဲ့သမီး ဆောင်းစက်ဝိုင်ဆိုတာပဲ"
"ဗျာ..."
"မာမီ့အသည်းတွေကို အစိမ်းလိုက် ခွဲချေပစ်ခဲ့တဲ့ အသည်းစားဘီလူးကောင်ရဲ့ သမီးပဲသား။ သူ့လိုလူရဲ့သမီးတစ်ယောက်မို့ မာမီ လုံးဝ သဘောမတူနိုင်ဘူးသား"
"ဗျာ..မာမီ..ဒါက"
"မင်းမာမီ့စကားကို နားမထောင်ရင် မာမီနဲ့ သေကွဲကွဲရလိမ့်မယ်"
"မာမီရာ.."
"မာမီ မင်းကို သမီးလေး မိုးမခနဲ့ပဲ သဘောတူတယ်။ မိုးမခကလွဲရင် ဘယ်မိန်းမကိုမှ မင်းမယူရဘူး။ ဒါ မာမီ့ရဲ့အမိန့်ပဲ"
အမိန့်ကို ကျွန်တော် မလွန်ဆန်ဝံ့။
"မာမီ မင်းကို အကူအညီတစ်ခု တောင်းချင်တယ်။ မင်းသူ့အချစ်ကို ရအောင်ယူပါ။ ပြီးရင် သစ်စိမ်းချိုးချိုးပြီး ဖြတ်ပစ်ခဲ့ပါ။ မာမီ ခံစားခဲ့ရတဲ့အတိုင်း သူ့သမီးလည်း ထပ်တူ ခံစားစေရမယ်။ ဒါ မာမီ့ရဲ့ ကလဲ့စားပဲ"
ကျွန်တော့်ရင်တွေ ပူလောင်နေတယ်။ ကျွန်တော့်ဆုံးဖြတ်ချက်တစ်ခုက ကျွန်တော့်ဘဝအတွက် အများကြီးအရေးပါမှန်း ကျွန်တော်သိတယ်။ နောက်ဆုံးတော့ ကျွန်တော် ဆုံးဖြတ်ချက်ကြီးတစ်ခု ချပစ်လိုက်တယ်။
"ဝိုင့်ကိုကျွန်တော်ချစ်တယ်"
"ချစ်ရေးဆိုတာ သိပ်မမြန်လွန်းဘူးလားရှင်"
"ကျွန်တော် ဝိုင့်ကို မြင်မြင်ချင်း ချစ်နေခဲ့တာပါ။
ကျွန်တော့်အချစ်ကို မယုံကြည်လို့လား ဝိုင်ရယ်"
ဝိုင် တခစ်ခစ် ရယ်နေလိုက်တယ်။
"မလှောင်ပါနဲ့ဝိုင်ရယ်..
ဝိုင့်ရယ်သံတွေက ကျွန်တော့်ကို သေစေလောက်တဲ့ လက်နက်တွေပါ။
ကျွန်တော် ဝိုင့်ကို ထမင်းစားနေရင်းလည်း ချစ်တယ်။
လမ်းသွားနေရင်းလည်း ချစ်တယ်။
နောက်ဆုံး ညဘက်အိပ်နေရင်တောင် အိပ်မက်ထဲထိ ဝိုင့်ကိုချစ်တယ်"
"ရှင်က ကဗျာဆရာလို့ မပြောရဘူးနော်။
စကားသိပ်တတ်တာပဲ"
"တကယ်ပါဝိုင်ရယ်...
ကျွန်တော် ဝိုင့်ကို အရမ်းချစ်တယ်"
"စဉ်းစားပါရစေရှင်"
ကျွန်တော့်အချစ်ကို ချက်ချင်းတန်းမငြင်းလိုက်၍ ကျွန်တော်ထခုန်မိမတတ် ပျော်သွားတယ်။
"စဉ်းစားပါဝိုင်ရယ်.. ကျေးဇူးပါကွာ"
ဒီနေ့ ဝိုင့်ဆီက အဖြေရတဲ့နေမို့ ကျွန်တော့်ရဲ့ ကမ္ဘာက သိပ်ကိုလှပနေခဲ့တယ်။
"သား... မာမီ့ဆီလာဦး"
"ဟုတ်မာမီ"
"မင်း သူ့ဆီက အဖြေရခဲ့ပြီဆို"
ကျွန်တော့်ရဲ့ အံ့သြမှုအတွက် မာမီမဲ့ပြလိုက်ရင်း
"မင်းကို မာမီ တောင်းဆိုထားတာ မှတ်မိလား။
မာမီ့ရဲ့ကလဲ့စားကို သားကူညီမှ ဖြစ်မယ်သား။
မာမီမင်းကို ဒီနေ့ဒီချိန်ထိ ကျွေးမွေးခဲ့ဖူးတဲ့ မိဘကျေးဇူးကို သိတတ်ခဲ့မယ်ဆိုရင် မာမီ့ရဲ့ဆန္ဒတွေကို ဖြည့်ဆည်းပေးနိုင်မယ်လို့ ယုံကြည်တယ်"
ကျွန်တော့်ခေါင်း ငိုက်စိုက်ကျသွားတော့တယ်။
"ဟုတ်ကဲ့ပါမာမီ။ မာမီ့စိတ်တိုင်းကျ ဖြစ်စေရပါ့မယ်"
********
ဝိုင် ကိုယ့်နားကိုယ်ပင် မယုံကြည်နိုင်ခဲ့။
"မင်းကို အပျော်တွဲခဲ့တာ"
"မာနကြီးတဲ့ မိန်းမမို့ ပညာပေးချင်ရုံ သက်သက်ပဲ"
"ဒီနေ့ကစပြီး မင်းနဲ့ပတ်သက်စရာ အကြောင်း မရှိဘူး"
"ငါ့ကို မေ့လိုက်တော့"
သတင်းစာထဲ ပါလာတဲ့ လက်ထပ်မင်္ဂလာပွဲအခမ်းအနားခေါင်းစီးဖတ်ရင်း သတင်းစာကို ဆွဲဖြဲပစ်လိုက်တယ်။
"ဒါတွေအားလုံး ဖေဖေ့အပြစ်တွေပါ သမီးရယ်။
ဒေါ်ခွန်းချိုရဲ့ ကလဲ့စားဟာ သိပ်ကြောက်ဖို့ကောင်းပါလား။ ဖေဖေ့ကြောင့် ငါ့သမီးလေး စိတ်ဆင်းရဲရပြီ"
"မဟုတ်တာဖေဖေ။ ဖေဖေ့ကြောင့်မဟုတ်ပါဘူး"
"ဟုတ်တယ်သမီး။ တချိန်က ဖေဖေနဲ့ ဒေါ်ခွန်းချိုဟာ ချစ်သူတွေ ဖြစ်ခဲ့ကြတယ်သမီး။ မိဘသဘောတူတဲ့သူကို ဖေဖေယူခဲ့ရလို့ သူဖေဖေ့ကို မုန်းနေတာ။ အခုတော့ ဖေဖေ့သမီးဟာ ကျွဲနှစ်ကောင်ခတ်နေတဲ့ကြားက မြေစာပင်လေးတစ်ပင်ဖြစ်ခဲ့ရပြီ။ ဖေဖေစိတ်မကောင်းပါဘူးသမီး"
"ဖေဖေရယ်.."
**********
ထွဋ်ခေါင် ကားကိုမိုင်ကုန်တင်မောင်းရင်း နဖူးက ချွေးစက်တွေကို ခါချပစ်လိုက်တယ်။
"ကယ်ပါဦး မေမေရေ...
သမီး သေရတော့မယ်"
"သမီးလေး... ခဏလေး အားတင်းထားနော်။
သားရေ ကားမြန်မြန်မောင်းပါ"
"ဗိုက်နာတာ သေတော့မယ်အမေရဲ့"
"ကျွီ..!"
"ဟာ.. သွားပြီ။ ကားဘာဖြစ်သွားလဲ မသိဘူး"
"သားရယ်.. တခုခု မြန်မြန်လုပ်စမ်းပါ။ မင်းမိန်းမ ကလေးမွေးတော့မယ်"
ထွဋ်ခေါင် ကားပေါ်မှ ဆင်းလိုက်ရင်း ကားစက်ဖုံးဖွင့်ကာ ပြင်ကြည့်လိုက်သည်။
"မရဘူးမာမီရာ...
ခဏနော်.. ကျွန်တော် အကူအညီတောင်းကြည့်ဦးမယ်"
"ဒုက္ခပါပဲ။ ဘုရားသိကြားမလို့ ကူညီမယ့်သူ တွေ့ပါစေ"
ညမှောင်ရီဖြိုးအချိန်မို့ လမ်းသွားလမ်းလာများ ရှင်းလင်းနေ၍ ထွဋ်ခေါင် စိတ်ပူနေလေပြီ။
ထိုစဉ်…
ကားမီးနှစ်ချက်တောက်လိုက်၍ ဝမ်းသာအားရဖြင့် လှမ်းတားလိုက်သည်။
"ကျမ ဘာကူညီပေးရမလဲ"
"အမလေး ကျေးဇူးရှင်ကြီးရယ်…
ကျမ ချွေးမလေး ဗိုက်နာနေလို့ပါ။ ကားပျက်သွားလို့ ဆေးရုံကို လိုက်ပို့ပေးနိုင်မလား သမီးရယ်"
"ရပါတယ် ကျမကားပေါ်တက်ပါ။ လမ်းကြုံနေတဲ့အတွက် လိုက်ပို့ပေးပါ့မယ်"
ညမှောင်ရီဖြိုးဖျချိန်မို့ ထိုမိန်းကလေး၏ မျက်နှာကို ကောင်းကောင်းမမြင်ရ။
ကားကို ဆေးရုံထိမောင်းပို့ကာ ထိုးရပ်လိုက်တော့
"ကျေးဇူးတင်လိုက်တာ သမီးရယ်။
ကျေးဇူးတင်တဲ့အနေနဲ့ အန်တီ့မြေးဦးလေးကို သမီးနာမည်လေး ပေးချင်တယ်။
တဆိတ်လောက် ပြောပြခဲ့ပါလား သမီးရယ်"
"ကျမက ဦးလွန်းစက်ရဲ့သမီး ဆောင်းစက်ဝိုင်ပါအန်တီ"
သူမရဲ့ကားလေး ဝေးသထက်ဝေးသွားတယ်။
ကျန်ရစ်ခဲ့သည်က နှလုံးသားတစ်စုံ။
ပြီးပါပြီ။ ။
Writer- ရွှေရည်ပိုင်မျိုး { Original }
